༄༅།། སྒེའུ་ཁུང་ཕྱི་རོལ་གྱི་ཆུང་མ་ལགས།
༄༅།། སྒེའུ་ཁུང་ཕྱི་རོལ་གྱི་ཆུང་མ་ལགས།
ཁ་བ་ཆེན་པོ་བབས་འདུག
དྲག་རླུང་གིས་ཕྱགས་མ་རྒྱག
ཁ་བ་རྒྱུན་ཆད་མེད་པར་འབབ་བཞིན་ཡོད་ལ།
ཞོགས་པ་ནས་མཚོན་མོ།
རླུང་ཤུགས་ཀྱང་ཧ་ཅང་ཆེ།
ཁ་བ་འཁྱིལ་བཞིན་འདུག
སྒེའུ་ཁུང་ནས་ཕྱི་ལ་ལྟ་དུས།
འཕྱོ་བཞིན་པའི་ཁ་བའི་འདབ་མ་དག
ཚོར་སྣང་དུ་མེ་ཏོག་དཀར་པོ་ཁྲི་ཁྲི་འབུམ་འབུམ།
དེ་དག་ནི་མཛེས་སྡུག་ལྡན་ཞིང་བལ་དཀར་ལྟར་འཇམ་པོར་སྣང་།
ཆུང་མ་ནི་སྒེའུ་ཁུང་ཕྱི་རོལ་ན།
སྒེའུ་ཁུང་ཕྱི་རོལ་གྱི་ཁ་བའི་ཚོགས།
དྲག་རླུང་གིས་རྣོ་ངར་ཅན་གྱི་རལ་གྲི་ལ་བསྒྱུར།
ཆུང་མ་ནི་དྲག་རླུང་དང་ཁ་བའི་འཚུབ་མའི་ཁྲོད།
ཁོ་མོའི་གདོང་། མིག་ཟུང་དང་སྐྲ་ལོ།
དྲག་རླུང་ཞོན་པའི་ཁ་བའི་འདབ་མ་དེ་དག་གིས།
རལ་གྲིས་བཞིན་སྣུན་བཞིན། རྨས་བཞིན།
ངའི་སེམས་ལ་དེ་བས་ཀྱང་ན་ཟུག་ཆེ་བ་ནི།
ཁོ་མོའི་འཁྱག་ལོག་གེའི་ལག་པ་གཉིས།
ད་ལྟའི་བར་དུ།
ཁྱིམ་ཚང་ཡོངས་ཀྱི་ཁ་རྒྱབ་ལྟོ་གོས་ཆེད།
ནམ་ཡང་མཚམས་འཇོག་བྱེད་མྱོང་མེད།
ཁ་བ་ནི་ཁ་བ།
ཁ་བ་ནི་མེ་ཏོག
རལ་གྲི་ཡང་ཡིན་ནོ།
ཁ་བ་ཁ་བ་ཡིན་པའི་དུས།
ང་ཁོ་མོའི་ཆར་གདུགས།
ཁ་བ་མེ་ཏོག་ཏུ་འདོད་སྐབས།
ངེད་གཉིས་ལྷ་ཡུལ་དུ།
ཁ་བ་རལ་གྲི་ལ་སྣང་སྐབས།
ང་ཁོ་མོའི་ཁྲབ་དང་རྨོག
རྩོམ་པ་པོ།： རྒྱལ་པོ།
༢༠༢༦ ཟླ་ ༡ ཚེས་ ༡༠ ཉིན།
.jpeg)
评论
发表评论