༼ ཐོ་ཐོའི་དེང་སང་གི་སེམས་ཁམས།༽
༼ ཐོ་ཐོའི་དེང་སང་གི་སེམས་ཁམས།༽
སྐྱེས་ནས་རྒས་ཤིང་མཐའ་མར་འཆི་བའམ།།
ཤི་ནས་གང་རུང་འབྱུང་བར་འཐིམ་པའི་རྡུལ།།
སྐྱེ་འཇིག་མི་རྟག་བར་དུ་སྐད་ཅིག་ཙམ།།
གནས་པར་ཤིན་ཏུ་སྲེད་པ་སྡུག་བསྔལ་རྒྱུ།།
ཡོད་ཀྱང་མེད་པར་སྣང་བའི་སེམས་འཛིན་དང་།།
མེད་ཀྱང་འབྱུང་དུ་སྲིད་པའི་སྣང་ཚུལ་གྱིས།།
འཇིག་རྟེན་བྱ་གཞག་ཡག་བཙོག་སྐྱིད་སྡུག་བཅས།།
ངོས་ལེན་གནང་བ་སེམས་ཁམས་བདེ་བའི་རྒྱུ།།
མཁས་ཀྱང་གཞན་གྱིས་མཁས་པར་མི་འདོད་པ།།
བླུན་ཡང་གཞན་གྱིས་བླུན་པོར་མི་མཐོང་བ།།
སེམས་ལ་འཆར་ཚུལ་ངག་ནས་བརྗོད་སྟངས་ཙམ།།
ཐ་སྙད་ཡག་བཙོག་མིང་ལ་སྦྱར་བ་ཙམ།།
མི་སེམས་འགལ་ཟླར་བཟོ་བའི་ཐ་སྙད་དག།
མཁས་བླུན་དབུལ་ཕྱུག་སྡར་མ་དཔའ་བོ་བཅས།།
དེ་བཞིན་རྒྱལ་ཁབ་རིགས་རྒྱུད་ཆོས་རྒྱུད་བཅས།།
མིའི་ཡུལ་དམག་འཁྲུག་སློང་བའི་རྒྱུ་གཙོ་བོ།།
དམག་འཁྲུག་མེད་ཚེ་རྒྱལ་ཁབ་མེད་ཀྱང་ཆོག།
དྲག་གནོན་མེད་ཚེ་རིགས་རུས་མེད་ཀྱང་ཆོག།
འགྲོ་བ་སེམས་ཅན་ཡོངས་དག་འདྲ་མཉམ་ངང་།།
གོ་ལའི་འབངས་ལ་བསམས་ཤིང་གནས་པར་ཤོག།
རྩོམ་མཁན། ཐོ་ཐོ། ༠༨-༠༢-༢༠༢༤
评论
发表评论