༄༅།། ང་ཕྱིར་ཕ་ཡུལ་དུ་ཐེངས་ཤིག་ཡོང་ན་འདོད་ཀི

 ༄༅།། ང་ཕྱིར་ཕ་ཡུལ་དུ་ཐེངས་ཤིག་ཡོང་ན་འདོད་ཀི

ང་ཕྱིར་ཕ་ཡུལ་དུ་ཐེངས་ཤིག་ཡོང་ན་འདོད་ཀི

ཡུལ་ཁམས་གཞན་ཞིག་ཏུ་གནས་རྐྱེན།

ཡུལ་མི་དང་ཁ་ཐག་ཇེ་རིང་ནས་སེམས་ཐག་ཀྱང་།

ཇེ་རིང་དུ་འགྲོ་བཞིན་པའི་ཚོར་སྣང་ཞིག འཇིགས་སྣང་ཞིག

གནས་ཚང་འདི་དང་ཁ་བྲལ་ཚེ།

ཕ་ཡུལ་གྱི་ཁྱིམ་དེ་ནས་ཁང་པ་འདིའི་ནང་དུ་བཞིན།

ནམ་རྒྱུན་སྐྱིད་སྣང་ཞིག་དང་མཉམ་དུ་གནས་ཐུབ་བམ།

ཁང་པ་འདིའི་གཡས་གཡོན་གྱི་ཁང་པ་དག་ཏུ།

མི་རྣམས་བདེ་འཇགས་དང་ཞི་འཇམ་ངང་གནས།

རྣ་བས་ཐོས་རྒྱུ་མེད་པ་ནི་ཚིག་རྩུབ།

མིག་གིས་མཐོང་རྒྱུ་མེད་པ་ནི་སྤྱོད་ངན།

སོ་སོ་ནི་སོ་སོའི་ལམ་ཁ་ཞིག་ན། 

སོ་སོ་ལ་སོ་སོའི་ལྟ་བ་ཞིག

འོན་ཀྱང་ཁོང་ཚོའི་ཁ་བརྡའི་ཁྲོད་དུ།

འདི་ལྟ་ལོག་པ་དང་དེ་བསྟན་དགྲ་རེད་ཅེས།

འཛིང་རེས་མེད། 

ཕན་ཚུན་དགྲ་རུ་འཛིན་པ་མེད།

གང་ཞིག་གདོན་འདྲེ་རུ་འདོད་མཁན་མེད།

ཁོང་ཚོའི་ནམ་རྒྱུན་གྱི་ཁ་བརྡའི་ཁྲོད་དུ།

དབུལ་པོ་ཞེས་པའི་ཐ་སྙད་དེ་གོ་རྒྱུ་མེད་ཅིང་།

འབྱོར་ལྡན་ཟེར་བའི་སྐད་ཆ་དེའང་ཐོས་རྒྱུ་མེད།

འདི་ན་ང་དང་ངའི་བཟའ་མི་དག

ཁོང་ཚོ་དང་འདྲ་མཉམ།

ཡུལ་འདིའི་འབངས་བཞིན་ནོ།

ཐོ་ཐོས། 22.05.2023

ད་ལྟ་བྲིས་ཚར་ཡིན། Päffikon ནས་ Uster ལ་ཡོང་བཞིན་པའི་ལམ་དུའམ་མེ་འཁོར་ནང་དུ་བྲིས་ཡིན།